Dina Pilgup Jabar, Daérah Militér III Siliwangi Kudu Nétral

Pangdam III Siliwangi, Mayor Jenderal TNI Sonny Widjaja. [Potret: mobile.seruu.com]

(SundaNews, Bandung) Pamilihan Gupernur Jawa Barat kari ngitung poé. Unggal calon geus pakepuk sumebar ka unggal sikluk enggoning mangaruhan calon pamilih. Lain baé ngadeukeutan masarakat biasa, dalah pajabat publik gé sarua dideuheusan. Pikeun nyinglar calon Gupernur nu luha-loho ka “kandangna”, Panglima Daérah Militér III Siliwangi, Mayor Jénderal TNI Sonny Widjaja, meupeujeuhan ka anak buahna sangka ngajaga kanétralan pasukanana.

“Sim Kuring meupeujeuhan sakumna anggota, teu diiwal-iwal, ulah aya sikep mihak atawa ngadukung salah sahiji calon, boh dina pilprés boh pilgup sareng pilkada di daérah. Ieu téh luyu sareng nu kaunggel dina sumpah prajurit TNI sareng buku saku TNI nu dipibanda ku tiap-tiap anggota TNI,” cék Sonny dina silaturrahim jeung média di Aula Makodam III Siliwangi, Senén (14/1/2013).

Nu dimaksud ulah ngadukung ku Sonny téh lain baé sual sora, tapi perkara maké fasilitas jeung asét TNI pikeun kapentingan pulitik deuih. Pikeun nalingakeunana, sok bisi aya anggotana nu baha, kalayan teges Sonny maréntahkeun Komandan Satuan di jajaran Kodam III Siliwangi. “Pami kapendak salah sawios prajurit nu ngadukung salah sahiji pasangan, tanwandé aya tindakan ka manéhna. Hukuman sareng drafna bakal disiapkeun di Detasemén Militér (Denpon),” cénah.